Fevralın 4-də Vaşinqtonda “İfadə Azadlığına 10 Əsas Təhlükə” adlanan bəyanat qəbul olunub. ATƏT-in Media Azadlığı üzrə Nümayəndəsi, BMT-nin İfadə Azadlığı üzrə Məruzəçisi, Amerika Ştatları Təşkilatının İfadə Azadlığı üzrə Məruzəçisi və Afrika İnsan və Xalq Hüquqları Komissiyasının Məruzəçisinin iştirakı ilə keçirilən tədbirdə qəbul olunan Bəyanatda növbəti onillikdə ifadə azadlığının üzləşdiyi 10 əsas problem göstərilib.

Toplantı iştirakçılarının fikrincə, ifadə azadlığı hüququnun həyata keçirilməsində böyük çətinliklər hələ də mövcuddur; belə ki, məhdud hüququ rejimlər, kommersiya və sosial təzyiqlər və iqtidar tərəfinin tənqidə qarşı tolerant olmaması bunu deməyə əsas verir.

ATƏT-in Media Azadlığı üzrə Nümayəndəsi Miklos Haraştinin sözlərinə görə, ATƏT-də fəaliyyətdə olduğu 6 il müddətində bir çox ölkələrdə media azadlığı sahəsində pisləşmə müşahidə olunub.

Hökumətlərin jurnalistlərə qarşı aramsız zorakılığı azad mətbuatın təhlükəsizliyində ciddi böhran yaradır. İnternetə məhdudiyyət qoyan və bununla da qlobal media azadlığına təhlükə yaradan ölkələrin sayı durmadan artmaqdadır.

Bir çox postsovet ölkələrində media azadlığı üçün struktur baxımından ən böyük çətinlik televiziyanın bütövlükdə hökumətin nəzarətində olmasıdır.

Bəyənatdakı sadalanan 10 təhlükə aşağıdakılardır:

- hökumətlər media üzərində birbaşa və dolayı nəzarət tətbiq etməyi davam etdirir;

- jurnalist səhvlərini şərəf və ləyaqəti ləkələmə, təhqir və ya böhtan kimi xarakterizə edən qanunvericilik bir çox ölkələrdə qüvvədə qalmaqdadır;

- jurnalistlərə qarşı zorakılıq halları geniş yayılıb və hökumətlər buna müvafiq şəkildə reaksiya vermir;

- konfidensiallıqla bağlı mövcud qanunvericiliyə istinad olunaraq jurnalistlərə və vəzifə sahibi olmayanlara informasiyanın verilməsində məhdudiyyətlər qalmaqda davam edir;

- köməksiz vəziyyətdə olan qrupların ifadə azadlığı hüququna qoyulan məhdudiyyətlər hələ də qalmaqdadır;

- artan təmərküzləşmə, reklam marketinin sıradan çıxarılması və başqa kommersiya təzyiqləri medianın ictimai maraq doğuran məlumatları yaymaq imkanlarını təhlükə altına qoyur;

- ictimai yayım mərkəzlərinin kifayət qədər maliyyə vəsaitləri yoxdur, bir çoxlarına isə ictimai xidmət mandatı verilməyib;

- təhlükəsizlik məsələləri və terrorizmin və ya ekstremizmin aydın tərifinin olmaması çox zaman tənqidedici çıxışların məhdudlaşdırılmasında istifadə olunur;

- bir çox hökumətlər məhkəmə işlərini, xüsusilə də difamasiya ilə bağlı işləri nəzarətdə saxlamağa imkan verən hüquq normaları tətbiq etməklə İnternetə nəzarət etməyə və ya onu məhdudlaşdırmağa çalışır;

- dünya əhalisinin böyük bir hissəsinin İnternetə çıxış imkanı məhduddur və ya heç yoxdur.