Bakı şəhəri Yasamal rayon Məhkəməsi “Femida” qəzetinin baş redaktoru Ə. Kərimovu Cinayət Məcəlləsinin böhtana görə məsuliyyət müəyyən edən bədnam 147.2 maddəsi ilə təqsirli bilərək aylıq qazancının 15%-ni dövlətə almaqla 1 il 6 ay müddətinə islah işlərinə məhkum edib. Ölkənin hüquq sistemində maraqlı araşdırmaları və tənqidi düşüncələri ilə tanınan jurnalistə qarşı cinayət ittihamını Azərbaycan Respublikasının Daxili İşlər Naziri c-b R.Usubov irəli sürüb. Jurnalistin həm Femida, həm də Azadlıq qəzetlərində dərc olunmuş yazılarında defamativ elementlər olduğunu deyən nazir ona cinayət cəzası verilməsini tələb edib, məhkəmə bu tələbi təmin edib.       

Media Hüququ İnstitutu (MHİ) jurnalistə ictimai önəmli məsələlərlə bağlı tənqidi yazılarına görə cinayət cəzası verən məhkəmə qərarını qətiyyətlə pisləyir, bunu Azərbaycan Respublikasının demokratik dövlət olduğunu və ifadə azadlığının müdafiə olunduğunu bəyan edən Konstitusiyanın mahiyyətinə zidd olan, zərərli qərar hesab edir.

Hər kəsin, o cümlədən dövlət rəsmilərinin şərəf və ləyaqətinin toxunulmaz olduğunu vurğulamaqla yanaşı MHİ bir daha xatırladır ki, hökumətin, dövlət qurumlarının, rəsmi şəxslərin işinin hərtərəfli və dərindən çək-çevir etməyə, müzakirə və tənqid etməyə, bəzən hətta sərt tənqidi fikirlər ifadə etməyə qabil media olmadan heç bir cəmiyyət sağlam və güclü, firavan və xoşbəxt ola bilməz. Hökumət qurumlarının, o cümlədən Daxili İşlər Nazirliyinin cəmiyyət üçün çox mühüm funksiyaları yerinə yetirdiyini, bu qurumların başında duran şəxslərin böyük məsuliyyət altında olduqlarını, onların nüfuzunun mühüm əhəmiyyət daşıdığını qeyd etməklə yanaşı MHİ bildirir ki, yalnız müstəqi, basqılardan azaq medianın mövcud olduğu, tənqidə dözümlü yanaşıldığı, ictimai problemlərlə bağlı ən kəskin müzakirələrə açıq olan hökumətlər və vəzifəli şəxslər toplumda gerçək nüfuz sahibinə çevrilmək imkanı əldə edə bilərlər.     

Media Hüququ İnstitutu son 6 ayda Cinayət Məcəlləsinin böhtan və təhqirə görə məsuliyyət nəzərdə tutan maddələrinə əsasən 7 jurnalistə ağır cinayət cəzasının verildiyini xatırladır. MHİ hökuməti ən qısa zamanda tənqidçi jurnalistlər barəsində çıxarılan bütün qeyri-adekvat qərarları ləğv etməyə, Nüfuzun qorunması ilə bağlı mütərəqqi qanun qəbul edilməsi yolunda müzakirələrə başlamağa çağırır.