Media Hüququ İnstitutu ölkə prezidentinin əfv sərəncamı ilə tənqidçi mövqeli “Bizim Yol” qəzetinin əməkdaşı Müşfiq Hüseynovun azadlığa buraxılmasını Azərbaycanda söz azadlığına xidmət edən addımlardan biri olaraq müsbət qarşılayır. Sözə görə məhkum edildiyi şübhə doğurmayan Müşfiq Hüseynovun hüquqlarının pozuntusunun aradan qaldırılması, onun azadlıqda olması tənqidçi medianın gözünün qorxudulması, sərt tənqidi yazı müəlliflərinin gözümçıxdıya salınması hallarının aradan qaldırılması baxımından təsirlidir.

Müşfiq Hüseynov 2007-ci ilin ilin yayında qurama ittihamlarla həbs olunmuşdu. Xüsusi xidmət orqanları jurnalisti rüşvət almada şübhəli bilərək saxlamış, ardınca məhkəmə jurnalisti Cinayət Məcəlləsinin vəzifəli şəxslər və inzibati qurum funksiyalarını yerinə yetirən şəxslər üçün məsuliyyət nəzərdə tutan 311.1-ci maddəsi (rüşvət alma) ilə təqsirli sayaraq 6 il azadlıqdan məhrum etmişdi. Vərəm xəstəliyindən əziyyət çəkən M.Hüseynovun sağlıq durumu son həftələrdə xüsusilə ağırlaşmışdı.

Media Hüququ İnstitutu ağır durumda olan jurnalistin azadlığa buraxilmasını təqdir etməklə yanaşı, daha 6 jurnalistin hələ də həbsxanada cəza çəkdiyini yada salır. Azərbaycanın cəsur tənqidçi jurnalistləri Eynulla Fətullayev, Qənimət Zahid, gənc blogçular Emin Milli və Adnan Hacızadə, eləcə də Sərdar Əlibəyli, Fərəməz Novruzoğlu müxtəlif şübhəli ittihamlarla ən ağır cəzaya məhkum ediliblər. Böhtan və təhqirə görə cinayət cəzaları saxlanılması ifadə azadlığını daim təhdid altında saxlamaqdadır. Qeyd olunan məqamların Ölkə Prezidentinin əfv sərəncamının faydalarını kölgə altına salması təəssüf doğurur. Media Hüququ İnstitutu Azərbaycan Prezidentini həbsdə olan bütün jurnalistlərin azadlığa buraxılmasını, ifadə azadlığını gərəksiz müdaxilələrdən qoruya bilən hüquqi mexanizmlərin yaradılmasını təmin etməyə çağırır.