Media Hüququ İnstitutu (MHİ) 17 May Ümumdünya İnformasiyalı Cəmiyyət Günü ilə əlaqədar olaraq “Azərbaycanda informasiya azadlığının durumu” mövzusunda Dəyirmi Masa keçirib. Dəyirmi Masada “Azərbaycanda ictimai bilgilərə çatım” adlanan hesabat açıqlanıb. Hesabat informasiya azadlığı ilə bağlı milli qanunların beynəlxalq müqavilələrə uyğunluğunun araşdırılmasını, MHİ-nın, jurnalistlərin, sivil toplum quruluşları fəallarının bilgi sahiblərinə göndərdikləri 350 yazılı sorğunun icrasının araşdırılmasını, qanunla bilgi sahibi sayılan 45 qurumun internet saytının monitorinq edilməsini əhatə edib. Araşdırmalar zamanı Rusiyanın İnformasiya Azadlığının İnkişafı İnstitutunun və Türkiyənin İqtisadi və Sosial Etüdlər Vəqfinin metodoloji vasitələrindən istifadə edilib. Hesabatın hazırlanmasına ABŞ-ın Demokratiyaya Dəstək Fondu (NED) dəstək verib.

“İnsan hüquqları üzrə Müvəkkil Elmira Süleymanovanın media qanunvericiliyinin qabaqcıl ölkələrin təcrübəsinə uyğunlaşdırılmasının vacibliyini vurğulaması təqdirəlayiqdir. Ombudsmanın İllik Hesbatında əks olunan tövsiyə defamasiya haqqında qanunun yaxın zamanlarda qəbul ediləcəyinə ümidlərimizi artırır”. Media Hüququ İnstitutunun Ombudsman Elmira Süleymanovanın 2009-cu il üzrə parlamentə verdiyi hesabatda media qanunvericiliyinin inkişaf etdirilməsi ilə bağlı yer alan tövsiyyələrə münasibətində belə deyilir. Qeyd edək ki, ombudsmanın illik hesabatında söz azadlığına hörmət, tənqidə dözümlü münasibət şəraitinin yaradılmasının vacibliyi hər bir dövlətin ümdə vəzifələri kimi vurğulanır: “Bu sahədə mövcud olan problemlərin həlli üçün xüsusi qanunun qəbul edilməsi vacibdir. Ombudsman Aparatı Media Hüququ İnstitutunun 2009-cu ildə təqdim etdiyi “Defamasiya (nüfuzun qorunması) Haqqında” Qanun layihəsini araşdırıb və müsbət dəyərləndirib...